BUNNAL BAHA' IN NGAN SUG NAKAWA' DAING HA NGAN SULUG?

by Maas Pusung
09/03/2016, Arbaa
Kuala Lumpur, Malaysia.

Bismillahirrahmanirrahim, Salawat iban salam pa Nabi junjungan taniyu kalasahan Nabi Muhammad Sallallahualayhiwasallam, ahli bait niya sampayna pa manga sahabat niya katan radhiyallahuanhuma.

PANAGNAAN SIN PAGTAWAGUN SULUG:

Kiyasulat halawm buku Tausug & Kesultanan Sulu, 2007 (Tausug and the Sulu Sultanate), in pagtawagun laung niya Sug atawakan Tausug yan kiyanganan sabab daing ha sifat sin kabuhianan nila ha kapuan maglalaud magdaragat (magiista, magbabanug, magaadjung magdaragang iban mangangayaw) hati niya in kabuhianan kabiyaksahan nila ha dagat. Kiyanganan isab Suluk sabab in sila nagaammal ammalan Sufi pagtawagun Suluk ha bahasa Arab. Hati niya, hangkan sila maisug magbunu' magparrang sabil. Sampayna pa bihaun mikit na in ngan Suluk kanila di ha Malaysia.[1]

Ha tahun 2008 pa tahun 2010, nabaktul in hambuuk blog ngiyanan Tausug Global [2], kiyabayta' halawm, biyuklad in suy-suy daing kan Prof Neldy Jolo, biyaddiin in kabaak niya sin panagnaan ngan Tausug, ha labay usul bahasa. Bihayni bang ta pasawahun;

• In pagtawagun Sug yan daing da ha ngan Sulug. In maksud sin Sulug yan kusug anud sin tubig atawa dagat. In magsabbut Sulug (Sollog) yan manga pihak Sama @ Badjaw, Iranun-Maranao-Maguindanao iban manga kaibanan Bisaya'.
• In Malayu amura in pagsabbut nila Sulug da amusadja di' makatu'lid sumabbut sin huruf "G" hangkan magtingug "K" mahinang Suluk[3].
• In Tausug nakauna asal Sulug da in pagsabbut, amusadja in dila' sin Tausug ini kabiyaksahan nila magtapuk sin tingug "L" ha dila' nila. In wala' magtingug wa', in halul magtingug hawl, in salampang magtingug sapang, in balimbing mangtingug baymbing, balay mangtingug bay, sulud magtingug sud. Hangkan in Sulug magtingug Sug.
• Bang kita imiyan in ngan Sug kiyawa' daing ha ngan Suluk sin Sufi, bima'na subay na awun in Islam nara mari pa Nusantara ampa kita kiyanganan Sug atawa Tausug. In Islam na kapamarinta ha Sug subay na tahun 1405. Bang bihadtu saway pa tahun 1405 nagsultan hi Syariful Hasyim way pa in ngan Sug?
• Bangta bassahun in nusulan kiyasulat nila, in ngan Sulug awunna ha tahun 1330 ha jaman panagnaan sin Majapahit ha masa hi Raja Hayam Wuruk namarinta. Kiyasulat nila halaum Negarakartegama in ngan Sulug, amusadja in pagsabbut nila Solot.
• Damikkian, ha awal pa yadtu, ha jaman sin Srivijiya namarinta ha Sumatra tahun 700 sampay na pa tahun 1200, awunna asal in pagsabbutun nila Solok manunjuki pa ngan Sulug. 

Sollog in pagsabbut sin pihak Sama @ Badjaw ha kusug anud sin dagat.

In kahaupuan niya, matilag masawa na katu', in ngan Sug daing da ha sasabbutan Sulug. Nagtupad na iban sin sasabbutan sin Brunei, Malayu iban Jawa. Maluhay tana hatihun, mahita' in ngan sin laud yaun kiyanganan Laud Sulu sabab sin nakawa' da daing ha sasabbutan Sulug.

Bang awun pa teori sin manga kataymanghuran taniyu labi maraw daing haini, malingkat in matipun taniyu hambuukun kapagsaw-sawhan in bukti' sin argument pakaniya pakaniya. In teori hi Prof Neldy Jolo ini ha pangatudku mahugut in katindug niya, biya'da sin bayta' niya, in uyusal niya anthro linguistic sabab sin kahatihan niya in bahasa Malayu, bahasa Sug, Tagalog-Bisaya' iban bahasa Iranun-Maranao, labi luba' na bahasa Anggalis.

Pagabut tahun 2013, nag reprint hi Asreemoro sin buku niya Tausug & Kesultanan Sulu ha Kuala Lumpur, giyanapan niya palawm in etymology (asal maana) sin Sug kiyawa' niya daing ha Sulug hi Prof Neldy Jolo. Pagabut tahun 2015, nakasulat hi Prof Neldy Jolo hambuuk buku ba'gu ngiyanan niya Sulug in Sabah: The Way of life and culture. Salta' piyasawa niya na halawm in asal sin sasabbutan Sug daing ha Sulug.

TEORI SIN PAGTAWAGUN SULUK HA BAHASA ARAB:

Bang awun manunulat mamayta' in ngan Sug yan in asal niya daing ha pagbahasahun Suluk, hati niya hambuuk siya daing ha ammalan sin manga ahli Tasawwuf (Sufi), in ini awun da isab kasabunnalan niya. Amu sadja ha pandapat ku marai' sadja hat coincidence sambat sin Anggalis. Marai' biya' sin Quote ha bahasa Anggalis iban sin Ku'ut ha bahasa Sug, atawa biya' sin Password ha Anggalis, Pasud bang ha Sinug. Hangka tingug agun hangkamaksud hangkasipat sagawa' way parsugpatan.

Sabab, halawm dunnya Islam, masi naman piyaglugatan sin manga ahli Lughah in kamaksuran tuud sin ngan Tasawwuf bang haiin in asal muassal niya. Bang mismu in ngan Tasawwuf masi naman musykil, biyaddiinna in kaadaan sin ngan Suluk yaun mimikit halawm sin institution ilmu' Tasawwuf? Tantu labi pa in musykil niya?

Laung sin kaibanan in ngan Sufi nakawa' daing ha waktu karatung sin manga pihak Muhajirin pa Madinah ha jaman sin Rasulullah SAW, sabab in manga Muhajirin nakalandu' in sigpit way karuunan nila malaingkan sawrung sin masjid Nabawi ngiyanan nila Suffah. Lagi' laung nila in panamung sin manga Muhajirin landu' in kamiskin danan nakabadju' Suf (bulbull kambing, sapantun karut sung gaddung). Laung nila di hayni na timagna' in ngan Sufi.

Halawm kitab Qamus Al-Muhit, di' laung niya magtupad ha ilmu' bahasa Arab in ngan Suffah mawn pa Sufi malaingkan daing ha Suffah pa Suffi. Hati niya duwa in fa.[4] Amusadja laungta bang mari kita pa Syariat Islam, misan unu na in ngan biyutang yaun, in kamaksuran sin pagnganan Tasawwuf (Sufi) maunda pa pangadji' akhlak mulliya sin Rasulullah SAW maglissin sin lawm atay magpalingkat sin pangaddatan. Mawunda pa pagtawagun Ihsan (Iman, Islam, Ihsan)[5].

Hikadtu ta pa ngan Suluk, ampana malami in paglugat nila bang haiin in asal muassal sin ammalan magsuluk ini. In ammalan Suluk ini yari halawm ukum sakup sin pangadji' Tasawwuf[6]. In tukuran sin kaibanan in ammalan Suluk ini simali' pa ammalan Samadhi (bartapha) sin manga Pandit/Bikshu sin manga Hindu-Buddha. Laung sin kaibanan in pangadji' ini hambuuk siya disiplin ilmu' Syariah taga puunan ha kaawal sin Islam.

"Ilmu' Tasawwuf nabilang siya halawm ilmu' syariat agama asal daing da ha Islam. Timindug in pamaratsaya ini ha pangita' sin manga nagaammal amuin miyamagad, bahawa in manga muslim awal yadtu manga sahabat nabi, manga tabiin, iban sin manga sila simunud hinang nila dan tudju pa kasabunnalan iban hidayah. In sara' sufi ini daing ha sifat kakahinang madaran pagbalik-balikan in pagibadat, hipu' in pagmatugul pa Allah, di' mabaya' malussung ha babaw dunnya, lumayu' daing ha ni'mat kasannangan, alta', iban pangkat amuin iyaangan-angan sin manga manusiya' kamatauran...[.]  salta' in hinang niya magkhalwat (magdugurugu isa-isa)  hinangun in pagibadat. In kahalan ini hihinang sin manga sahabat nabi iban manga muslimin awal atawa salaf"- Muqaddimah, Ibn Khaldun.[7]

Alhasil, in kamaksuran tuud sin pagtawagun Suluk sin Sufi ini magmusafir batin. In agi hi Syaikh Nuh Ha Mim Keller, hambuuk tau Milikan nagtarjum sin kitab Tasawwuf dakula';

"Traveller (Salik) derives from travel (suluk), meaning to proceed along, the allusion being to the spiritual journey, meaning one's seeking knowledge of the rules of religion with seriousness and effort, to thereby reach Allah Most High and be saved perdition". Umdat al-Salik.[8]

Kitab Suluk Tasawwuf daing ha guru dakula' mazhab Syafi'i.

TEORI SIN NGAN SULUK NAKAWA' SIN ARAB DAING HA NGAN SULUG:

Awun hambuuk buku daing ha Philippines in tadjuk niya Queast of the Dragon and Bird Clan, 2006, sulatan hi Paul Kekai Manansala. Iyurul niya in nusulan sin bangsa Sayabiga (Zabag). In layu' sin kiyaabutan sin paguki' saiksik niya naabut niya in puunan sin manga asal muassal sin Sufi ha Basrah, Iraq. Laung niya awun parsugpatan sin manga awal Sufi ha Basrah iban manga Esmailiyyah amuin sugpat pa bangsa Sayabiga daing ha Nusantara. 

Asal in manga bangsa Sayabiga tagna' asal sila kimakaput agama Buddhis daing ha mazhab Tantric. In sila makusug magbaltapa (tafakkur @ Meditation). Datung nila daing ha Nusantara pa India, daing ha India pa Iran, abut na pa Iraq hangkan sila ini mataud ha Basrah.

In pangadji' Sufi nabaktul in institution niya tuud muna-muna ha Basrah, Iraq ini ha awal tahun 700. Hangkaan kabaakan ta in ngan hi Syaikh Hassan Al-Basri[9] iban hi Rabiyatul Adawiyyah[10] halaum kakitab-kitaban sin manga Sufi Sunni. Nabilang sila ini panagnaan sin Sufi Salafussaleh (Salaf) timagna' daing ha Basrah. In bayta' sin manga ahli nusul, hi Syaikh Hassan Al-Basri ini in liyuuran niya daing ha Iran. Bang sawpama siya iyagaran atawa piyagguruhan sin manga Traveller daing ha Iran, tantu makagad da isab in manga Sayabiga.

In paguki' sayksik hi Paul Kekai Manansala misan mataud in interpretasi niya ha data di' magsulut iban sin panghati ta, sagawa' nakadihil siya katu' hambuuk dan lalabayan madtu pa maksud. Sabab bang mari katu', in nusulan sin pagtawagun niya Sayabiga malaggu' in parsugpatan niya mari pa Sulu. Bang ta ta'taun in pagiyanun nila Zabag/Zabaj/Srivijaya/Sanfotsi, asal tuud langkit da pa Zolo, Solo, Sooloo, Solor, Solox, Solok, Solot, Suluk, Sulug, Sug, Lozones, Lucoes, Joloano (Holoano), Moros, Pilak @ urang Pilipin (in pagtawag sin manga Sabahan mabunsi ha Suluk ha bihaun masa).

Kiyasulat nila in bangsa Sayabiga ini mabuntul iban maisug kunu', amuin pagtawagun nila bihaun Amphibian Warrior. 

"From all these sources which in perfect agreement, it is evident that the Sayabiga were naturally soldiers, disciplined, used to the sea, faithful servants which qualities rendered them most suitable to serve in army by land or sea, to act as guards and to act as soldiers, guards, police officers, gaolers and warders of the treasury."

Sumagawa' in kiyasulat isab sin manga manunulat nusulan sin Nusantara ini, bahawa in tutug mahunit atuhan ha masa sin Empayar Majapahit timagna' tahun 1330, sampay na sadja imabut in patahunan 1900's, amuna in pagtawagun Men of the Sulu Sea.

Bukti' daing ha manga panunulat Milikan.

Ha pandapat ku, in miyaksud Zabag @ Zabaj atawa Sayabiga (Sanfotsi @ Srivijaya) ini amura in manga tau daing ha kapuan Sulug (Sulu) amuin di' magtuna' magsasaban maglayag kadtu mari nakalalamud nasadja sin paghilu-hala' bang sila kaabutan, sabab sin nagatap da ha sulatan hi Al-Biruni (c.1030) iban hi Al-Mas'udi (c.934) iban manga kaybanan panunulat Islam nakauna.

"Kapu'puan mawun tampal pa subangan ha lauran ini (Laud Champa @ Vietnam), amuin labi masuuk pa China daing sin pa India, amuna in pagtawagun kapuan Zabaj, amuin siyabbut sin manga tau Hindu, Suvarnadvipa, amunayaun in kapuan bulawan... karna', makakawa' kaw mataud bulawan hinangun puunan bang kaw makahugas misan hat sadja maniyu' tiyu' lupa' daing ha ginlupaan sin hula' niya"- Al-Biruni[11].

"Ha laud Champa (tampal pa subangan ha laud satan sin China) amuna in kiyatampat sin pamarinta Maharaja, raja sin kapu'puan, amuin nagkakawasa ha manga pamarinta way tubtuban iban mataud sundalu niya di' maitung. Misan pa kappal pinaka maladju di' da makaubus layagun halawm duwa tahun maglatag sin kapu'puan kiyapagkawasahan niya. In wilayat sin raja ini magpaguguwa' hasil indaginis pamapa iban manga kahamut hamutan, iban way pamarinta makawasa dugaing halawm dunnya ini simali' ha pagdaya mataud lupa' kiyapagkawasahan niya."- Al-Mas'udi[12].

Damikkian in kiyasulat hi Antonio Pigafetta (1491-1531), Tome Pires (1512-1515), Fernão Mendes Pinto (1614) nasabbut nila in bangsa pagnganan Lucoes (Luções) amuin maisug magbunu' ha laud iban mati'but maglayag magdagang kadtu mari maglatag sin kahula' hulaan. In pangannal nila in pagtawagun Lucoes yaun manga Visaya atawa manga Tagalog atawa baha' manga bangsa dugaing yaun ha Mainila (Luzon bihayaun). Bang ta pinu-pinuhun papagbatukun daing ha data sin Ming Dinasty ha China, in kamaksuran sin pagtawagun Lucoes amura in Tausug (Sulug). In kahalan ini piyasawa pa hi Francisco Combés (1620–1665) kakadtu niya pa Sambuangan (Siukon, Zamboanga) in pagtawag niya Lutaos ha manga tau maisug namamarinta ha Sambuangan (nakadugaing in paghidja', in patut niya Lucoes bukun Lutaos, bang bukunda salla' hi Combes nagsulat atawa salla' sin nagtarjum). 

In miyaksud hi Combes, in pagtawagun yan Lutaos naghuhula' ha Jolo iban ha Zamboanga, in sila maisug magbunu' pagpakayun sin manga kahula'-hulaan ha katilingkal Nusantara paatuhun ha kuntara nila. Sultan Buayan (Maranao) laung hi Combes wayra kusug misan in sundalu niya mataud, labi makusug in Sultan Maguindanao laung niya misan tiyu'tiyu' da in sundalu niya sabab sin tiyatabangan siya sin manga Lutaos amuin yaun nagjajaga sin pu' Jolo.

Laung sin manga panunulat kaibanan, in tau Sulu laung niya maingat magbahasa Malayu ha masa nakauna sawaypa karatung sin manga bangsa manglulungkup. Mismu hi Dr Adrian B. Lapian hambuuk historian sin Indonesia ha teori niya, bahasa Malayu kunu' in bissara sin tau ha Sulu tagna', pagkaun sin manga Tausug daing ha Luzon-Visayas kiyagantian na in bissara pa bahasa Tausug. Tantu awun sadja Tausug in kimahagad sin tukud-tukud nila ini. Hangkan subay in manga bangsa Sug uki' sayksikun nila in kaawal sin Tausug yaun ha kabuku-bukuhan siyulat sin bangsa dugaing bat nila kaingatan bunnal atawa bukun in tukuran sin manga kaibanan manunulat.

PAG PASAWA SIN KABTANGAN SULUG HA KABIYAKSAHAN SIN HULA' MALAYU IBAN SUGPAT NIYA PA HULA' ARAB

Bang sawpama laungta asal na kita pagtawagun bangsa Sulug (Sug) ha waktu nakauna pa yadtu sawaypa kapagbata' sin Nabi Muhammad Sallallahualayhiwasallam, sabab sin kabiyaksahan nila ra in manga bangsa Sulug yaun nagdaragang ha Iran, Iraq lagbas pakahula'-hulaan Arab dugaing, biyaddiin baha' in proses sin kabtangan Sulug nahinang Suluk ha dila' sin Arab? 

Sabab matampal ha manga panunulat nusulan sin Nusantara, in dila' Arab bang sumabbut "Zabag" magtingug "Zabaj", bukun "Zabak". Hati niya in huruf "G" ha duhul kabtangan magtingug "J" bukun "K".

Biya' da sin kiyasulat sin manga manunulat, in kiyakilahan nila bangsa Sayabiga ha Iraq-Baghdad makusug magammal Tafakkur Buddhis Tantric (Bartapha) sapantun magjikir, kiyahidayatan mayan sila simud Islam nahinang sila bubunu' mananabang iban nakalamud sila ha manga tumpukan Sufi awal ha Basrah, Iraq. Nag convert sadja sila sin ammalan Tantrik nila pa ammalan zikrullah sin Islam.

Tantu sadja, marai' in ngan Suluk sin ammalan Sufi ini daing da ha ngan Sulug nahinang alian atawa danglay sadja ha panagnaan, manunjuki pa ammalan Tantrik sin manga Sulug, maglulugay mikit na pa ngan Suluk. Atawa, madaran pagkarungugan nila ha dila' sin manga bangsa Malayu Sumatra in gulalan Suluk ini yaun asal mataud nagdaragang ha Basrah. Sabab, nasabbut sin Buddhis China bahawa in bangsa Malayu Sumatra ini in agama nila kamatauran Buddhis Mahayana bukun Buddhis Tantrik. Mataud parbiddaan sin mazhab Mahayana daing sin mazhab Tantrik

da sin kabiyaksahan sin dila' Malayu in "G" ha duhul magtingug da "K". Sulug mahinang Suluk. Hangkan ayaw kita mainu-inu di ha Malaysia iban Brunei in pagtawag ha Tausug ha dila' nila Suluk. Manjari ta pagsulayan, sumulat ha katas "SULUG" ampa pabassahun ha manga Malayu, in tingug niya Suluk da bukun Sulug.

InsyaAllah, murah-murahan dulan sin Nagpapanjari, ha sulatan sumunud, uki' sayksikun ta isab in pagtawagun Suvarnadvipa bang unu in sugpat niya pa Sulug (Sulu). Lilayun ta in pagtawagun LUCOES @ LOZONES ini ha jaman sin Srivijaya iban Majapahit sampay pa Thailand iban Burma abut mari pa China Ming Dinasty, langkit da mawn pa pagtawagun nila Solok di ha Sumatra iban Malaysia. Bang awun salla', nagkulang naglabi ha bukun maraw aturun iban bassahun, mangayu' aku kamaapan. Wallahu a'lam bish-shawabi...

Mahuli wassalam...

Footnote:

[1] Asreemoro @ Asree Sug, Tausug & Kesultanan Sulu, 2007 Kuala Lumpur, pg. 16.

[2] http://tausug-global.blogspot.com, baktulan hi Asreemoro @ Asree Sug 2008.

[3] Mahaba' in pagpasawa hi Prof Neldy Jolo halaum buku niya Sulug In Sabah: The Way of Life and Culture, 2014 Kuala Lumpur, pg. 29-39.

[4] Al-Qamus Al-Muhit (Arabic: قاموس المحيط‎) ("Comprehensive Dictionary"), by Al-Fīrūzābādī (1329-1414) Abu Tahir Majid al-Din Muhammad Ibn Ya'qub Ibn Muhammad Ibn Ibrahim al-Shirizi al-Fairuzabadi.
[5] Hadith Jibreel, Hadith umbul 2 halawm sin Hadith 40 Imam An-Nawawi, riwayat Imam Muslim rhm.
[6] Hati niya taga Qawli, Qalbi, Fi'li, amuna in ammalan limingkud magpatanam tutug magjikir balik-balikan sabbutun in ngan sin Allah SWT. Magsambahayang, magpuasa atawa salat da in pagkaun, paginum iban mahang na gumuwa' mamanawan. Magjikir sadja, in manaw amura in atay niya limaya madtu pahadirat sin Allah SWT.
[7] Muqaddimah (DBP KL, 2009), pg. 631. Ibn Khaldūn (/ˌɪbənxælˈduːn/; Arabic: أبو زيد عبد الرحمن بن محمد بن خلدون الحضرمي‎, Abū Zayd ‘Abd ar-Raḥmān ibn Muḥammad ibn Khaldūn al-Ḥaḍramī; May 27, 1332 – March 19, 1406) was a (Tunisian) Arab Muslim historiographer and historian, regarded to be among the founding fathers of modern sociology, historiography, demography, and economics. (Wikipedia).
[8] Syaikh Nuh Ha Mim Keller, Author's Introduction to 'Umadat al-Salik, m.s. 48.
[9] Al-Hasan ibn Abi-l-Hasan al-Basri (Arabic: الحسن بن أبي الحسن البصري‎) (642–728), also known as Hasan al-Basri (حسن البصري), was a well-known Muslim preacher, theologian, and scholar of Islam who was born in 642 from Persian parents. (Wikipedia).
[10] Rābiʻa al-ʻAdawiyya al-Qaysiyya or simply Rabiʿa al-Basri (717–801) was a Sufi mystic who lived in the eighth century. She was regarded as the first female saint of Sufism, the mystical tradition of Islam. (Wikipedia).
[11] Abū Rayḥān Muḥammad ibn Aḥmad Al-Bīrūnī (Chorasmian/Persian: ابوریحان بیرونی‎‎ Abū Rayḥān Bērōnī; New Persian: Abū Rayḥān Bīrūnī) (4/5 September 973 – 13 December 1048), known as Al-Biruni (Arabic: البيروني‎) in English, was a Khwarezmian Iranian Muslim scholar and polymath. Al-Biruni is regarded as one of the greatest scholars of the medieval Islamic era and was well versed in physics, mathematics, astronomy, and natural sciences, and also distinguished himself as a historian, chronologist and linguist. (Wikipedia).
[12] Al-Mas‘udi (Arabic: أبو الحسن علي بن الحسين بن علي المسعودي‎, Abu al-Ḥasan ʿAlī ibn al-Ḥusayn ibn ʿAlī al-Masʿūdī; c. 896–956) was an Arab historian and geographer. He is sometimes referred to as the Herodotus of the Arabs. Al-Mas‘udi was one of the first to combine history and scientific geography in a large-scale work, The Meadows of Gold and Mines of Gems (Arabic: مروج الذهب ومعادن الجواهر‎, Muruj adh-dhahab wa ma'adin al-jawhar), a world history. Al-Mas‘udi's travels actually occupied most of his life from at least 303/915 to very near the end. His journeys took him to most of the Persian provinces, Armenia, Azerbaijan and other regions of the Caspian Sea; as well as to Arabia, Syria and Egypt. He also travelled to the Indus Valley, and other parts of India, especially the western coast; and he voyaged more than once to East Africa. He also sailed on the Indian Ocean, the Red Sea, the Mediterranean and the Caspian. (Wikipedia).

SABAH HAK SIN MALAYSIA

SABAH HAK SIN MALAYSIA: INSTITUTION SIN "SULTANATE OF SULU" MAWGAY NA BIYUGIT SIN TAUSUG PA BULIAN DAGAT SIN "SULU SEA"?

Paglangku' langku' hi Maas Pusung (MP) iban hi KIRAM SABUNNAL (KS) ha SKYPE.

KS:
Tupna tuud sin Malaysia surun sin manga TAGDAPU HULA' (Sultanate Kiram) yan bat sila makasayu in SABAH yan bukun hak sin Malaysia...

MP:
Bang ha pandapat ku bukun TUP sin manga KIRAM sumud mamunu' madtu pa Sabah ampa magnama in sila TAUSUG SULTANATE OF SULU tagdapu sin SABAH. Naglaug sadja sin baran iban pa tau dugaing... sabab in Sulu Sultanate biyugit na sin Tausug pa laud Sulu ha tahun 1910's pa yadtu.

KS:
Yari ra in sulat sanda' sin pamili namu' KIRAM ha lima sin UK... Sulat sanda' pa company British tahun 1878. In pamili namu' yaripa in manga pawaris niya magkleim sin hak namu'. Kamaasan namu' in nagsanda', kami anak apu' nila ra in manjari tumuntut sin hak sandaan.

MP:
Nalub na sayan in sulat sanda' yan... in nanglub raayat da sin SULU SULTANATE amuin di'na mabaya' pamarintahan sin manga kadatuan iban Kasyarifan (Kasalipan). Magpakarungug sakaw yan suy suy, in manga kadatuan iban kasalipan naglupus sin pangkat nila? Atawa misan way naglupus di' na sila mabaya' kilahun KARATUAN iban KASALIPAN? Mismu in manga ngan PANGLIMA duwal ngan dakuman in kiyabin nahinang na ngan sin kawman bihaun ha Sug iban ha Tawi-Tawi, bihaun wayna pag panglima... sabab sin LIYUPUS NILA NA IN PUUNAN sin SULTANIYA sin SULU ha waktu pa sin BUNU' BUD BAGSAK iban BUNU' BUD DAHU' 1910'S. Pagwafat sadja sin Sultan Jamalul Kiram II ha tahun 1936... didtuna nalupus total in institution sin Sulu Sultanate sampay iyabutanna sadja sin bunu' jipun. Sampay pa bihaun wayna nakapamarinta... bima'na LIYUPUS.

KS:
Manjari ra kami timindug magbalik magtuntut sin Sabah... in kami wayra naglupus sin pangkat namu'. Masi ra kami in tagdapu sin SABAH.

MP:
Amu sayan in masaalla niyu pinaka dakula', magnama sadja kaniyu in Sabah sagawa' ha realiti niya mismu in Sulu yaunda halaum lima sin Philippines. Biyaddiin na in katuntut mu sin sanga kahuy bang in puunan sin kahuy yaun da ha lima sin tau dugaing?

Marawpa kamu katan naggugulal SULTANATE OF SULU himipus hipus na magad manglawag magkabuhianan maraw ha Philippines magbaktul sin hikarayaw ha Tausug ha katiluagan.

KS:
In Tausug way naraug nagbunu'... in hak yaunda kanila (Tausug). In hak sin Sultanate of Sulu yaripa kamu' manga kadatuan magsusultan.

MP:
Nakalandu' na in taud sin manga magsusultan yan... di' na maambat... hangkansa kamu pagkatawahan na sadja sin manga satru', maggulal Sultan Sulu sin way kawasa way raayat, awun hula' sagawa' di' makapamarinta. Bang sadja in manga naggugulal SULTAN SULU ginisan yan maghambuuk kumusug sakamu yan.

KS:
Amu sayni in masalla kamu'... manga amaun ku yaun nagayas na simakat nagsultan Sulu... sagawa' di' da mapinda in kaadaan nila. In kaibanan manga pangtungud ku, nagayas na naglawag sin lalabayan pa guwa' hula' magkleim alta' sin Sultanate of Sulu... failure da katan... naabut na sadja in pagsud pa Lahad Datu nagbunu' iban Malaysia, miyatay sadja wayra nakakawa' unu unu.

MP:
Hundungi niyu in pagkleim sin Sabah bang in Sulu di' niyu ra makleim. Sabab atuhan kamu sin Tausug Malaysian bang kamu sumud madtu mamunu' mangagaw. In Tausug Malaysian labi 1 million in banus nila ha Malaysia dugaing pa in manga kulurum. Di' sayan magpasad in manga Tausug Malaysian puhingaun in kabuhianan nila sin manga MAGSUSULTAN bang sumud mamunu'. Sabab sila ra manga Tausug Malaysian in kaput putan sin Malaysia tukurun gapi' pa SULTANATE KIRAM. Malapay na isab in manga kulurum nanglalawag kabuhianan saggawun.

KS:
Subay in manga Sultanate sin Kiram magtaayun iban manga kaibanan magsusultan, maghambuuk iban manga MNLF iban Abu Sayyaf umagaw sin SABAH bat hikabalik patagdapu.

MP:
Amu sayan in di' kapaghatihan ta maraw... dahun niyu maghambuuk in mahadjana' bat makaagaw sin Sabah... mayta' pa bukun agawun niyu in hula' Sulu mismu muna makaguwa' daing ha lima sin PHILIPPINES? Nahilu tuud in manga MAGSUSULTAN di' na tui' makabatuk sin tiranan maamu.

In panayma' sin manga Tausug Sabahan hangkan sila umatu kaniyu, madtu kamu sumud palaum Sabah umagaw... ampa niyu hitukbal pa Philippines... kita' nila in manga magsusultan di' na maambat ha Sulu yan way pus sabab daraakun da sin Philippines. Di' hikamumpaat... hangkan sa sila (tausug Malaysian) gapi' tuud ha parinta sin Malaysia umatu ha KIRAM. Sabab sin di' naman mabaya' laugan.

NOTE:
Halaum dunnya ini mataud daysab bangsa dugaing maisug magbunu' umatubang ha satru'... biya' sin manga bangsa Zulu ha South Africa... misan sila maisug sagawa' naraug da sila sin tipu akkal sin Anggalis. Damikkian in Sulu Sultanate, klaro na in isug sin Tausug... hikasanda' pa in hula' niya, sahingga in puunan hula' niya dihil pa Philippines bukun sadja ha tahun 1962 sagawa' ha jaman sin Milikan asal in Sulu Sultanate imakun na in Milikan hinang nila na AMA'.... Ama' da isab in dimihil ha anak niya piyajagahan ha Philippines....

Sung na kita niyu mangabuhianan maraw manga Tausug Malaysia iban Tausug Filipino....

Wassalam

BAHUNUS BUNU' HIPAMUHINGA' HA MANGA BANGSA SUG?

BAHUNUS BUNU' HIPAMUHINGA' HA MANGA BANGSA SUG? 
PILIGRU MAGABUT SADI'PA MAAWUN IN BUNU' SIN CHINA MARI PA HULA' TANIYU

In kaku' ini misan iyanun tana hat guni-guni. Misan bihadtu awun tuud ini kabunnal bang ta pinu-pinuhun bassahun in manga ginisan balita' halaum surat habal jumatu pa bangsa Sug ha duwa pa 3 tahun susungun. Yari in guni-guni ku hinang ku kronologi:

1: In Philippines (lamud in Sulu Mindanao) hinangun BASE sin Milikan-Anggalis magbalharap iban China ha program BUNU'-BUNU' ha susungun masa, sabab sin mag agaw Bulawan Itum (petroleum) ha laud sin SOUTH EAST ASEA SEA..... biyutang nila, punud in kawasa sin Milikan ha lugal ini ha tahun 2025. Sabab asal program sin manga satru' Tunggal Mata magRESET balik sin sistim dunya bang in sistim nakauna malarak (malarak in sistim ekunumi kaagi sin utang CREDIT ganda RIBA'). Hangkan sila magagaw bulawan itum (petroleum) sahingga maawun in bunu' dakula'.

2: In China nakabahu' ha hibal sin Milikan magtuy siya imagaw miyutang base ha SOUTH CHINA SEA (SCS) ampa siya similawak SUKU' NIYA. Way mahinang sin Milikan namikilan biyaddiin in katuhug niya ha ilung sin NAGA PULA yaun bat magad sin daakan niya.

3: Imus-us in Milikan limawag sabab, kita' niya in Tausug hambuuk PUUNAN dakula' (aset) hipagdomino niya bat in China kahukutan magad kaniya atawa mahansul bang maglugus magbunu'.

4: Ha tahun 1993-1994, similawak hi Sultan Jamalul Kiram III magtuntut sin SABAH ha press Con niya. Giyapian sin Manila. In parinta Malaysia hiyanggaw. Awun hambuuk ustaz daing ha Kuala Lumpur ngiyanan UST ASHAARI MUHAMMAD (Jamaah AlArqam) nagbak iban sultan Jamalul kiram III duma magsulut, sagawa' kita' sin Malaysi in ustaz ini gapi' ha kiram. Ha tahun 1994, in jamaah Arqam ini hiyaram sin Malaysia, siyaggaw in nakura' nila katan siyuplu' palaum ISA. Kita' ini sin milikan hambuuk sabab dakula' makabalik siya pa Pinas magpustu ha Sulu Mindanao (sabab bakas in USA nabudjaw daing ha Subic Bay Philipines tahun 1992, biyudjaw sin manga ahli senat biya'tal in agreement base).

5: Kita' ini sin Milikan awun 3 groupo, KIRAM-MNLF-ABU SAYYAF, lawagan dan hinangun bagid hipanantik bat malaga. Sagawa' biyaddiin baha'? Urulun ta, nag final peace agreement 1996 MNLF - MANILA in haulihan asal milikanna laungta sabab sin OIC asal ha babaan da sin UN. In UN laungta ha babaan da sin USA-JEWS BANKERS. Ha tukuran ku, bat mahipus niya in MNLF magad pa Pinas sagawa' ampana nagjagjag imuplut naysab in MILF. Pagka in MILF bugaan, in MNLF isab nahurut na palaum ARMM sin PINAS, ampa in JEWS MILIKAN simud palaum sistem ekonomi sin SOUTH EAST ASIA giyanggut nila biyaba', jimatu in ECONOMY CRISIS ha tahun 1997-1999. Malaysia nakasurvive sagawa' timagna' in politik niya najagjag (Dr Mahathir vs Anwar Ibr.).

6: Kiyab kiyaban in pasu' sin Malaysia iban Indonesia (siguru milikan-jews in kimiyab) nag agaw sin Pu' Sipadan iban Ligitan sabab sin nagagaw BASIN PETROLEUM yaun duun. Nag pasu' in duwa hula' diya nila pa ICG in kes naghukum, kansiyu in pu' Sipadan iban Ligitan ha tahun 1998. Sa'bu nag huhukum ini, awun nagbaktul program daing ha Pinas mari pa Pu' Sipadan.

7: Ha masa paghukum sin Malaysia vs Indonesia ini asal hi Erap namarinta sin Pinas, priogram in Abu Sayyaf pa pu' Sipadan ha bulan April 2000. 6 tau liyundat ini kiyapangasubuhan ku ha Sug, hi Erap kunu' in nangdaak, sagawa' bang ta urulun, awun gulamay sin Milikan naggastu, daing pa ha DOLLAR iban Sanjata' dakula' dihil ha manga maglulundat. Liyukat da sin bisnisman sin Malaysia. Sagawa' in mahalga' di ha Milikan amura natannyag na ha katilingkal dunnya in kahalan sin awun TERRORIST ha SULU sugpat bahasa pa OSAMA BEN LADEN.

8: Liyarak sin Milikan-Jews in Twin Tower WTC New York ha tahun 2001 biyustak nila hiyansul, ampa nila tiyukud kan OSAMA ben LADEN in namustak, daing haini nagsugpat in pagkaTERRORIST hi Osama mari pa Abu Sayyap ha Sulu. Basta naglami-lami in milikan... jagjagun niya in ASIA-North Africa abut pa SOUTH EAST ASIA. Siyulat nila in program umabut pa tahun 2025 in program ini sumampay pa South East Asia.

9: Hi Prof Nur Misuari imatu magbalik ha Pilipinas nahinang paguy pa Sabah ampa siyaggaw sin Malaysia ha November 2001. Di' tana ini kaingatan bang in maas ini tiyuud biyudjaw pa Malaysia sabab sin nagsugpat tuud iban sin kaybanan kes jimatu. Nahinang naysab issue global in pagsaggaw ha maas ini. Biya' sapantun, piyadugal in manga MNLF supaya umatu ha Malaysia. Ahaa... nabungkal saini in history sin MNLF tiyabangan sin Malaysia imatu kan Marcos 1972 (MNLF vs MARCOS). Hati niya in sali' muslim nagtabang tiyabangi, piyapagtakbi', nagkuntara na in MNLF iban Malaysia sabab sin kasaggaw kan Nur Misuari. Satru' bayannnnn....

10: Pagabut 17 Disember 2002, miyustak naysab in issue DIMAUG IN MALAYSIA ha ICJ nagagaw Sipadan-Ligitan. Diyaug in Indonesia (17 in hakim ICJ: 16 hakim voto pa malaysia, 1 da hakim voto pa Indonesia) sabab in iyusal sin Malaysia bukti' bahawa in tagdapu sin Sipadan iban Ligitan amura Sultanate Of Sulu piyadjak sin Anggalis ampa tiyukbal pa Malaysia ha MANDATE sin UNITED NATION. Di haini, na vulgar naysab in ngan sin Sultanate of Sulu. Yampa kita....

11: Nahilu hala' na in manga anak apu' sin manga kasultanan Sulu nakauna. Hi Jamalul Kiram III nagpatampal naysab, simud in manghud niya nagpatampal hi Datu Esmail kiram bin Punjungan daing ha pu' Simunul, Tawi-Tawi. In manga kiram daing ha pamili Datu Esmail bin Mawallil wasit, biya' na kan Datu Fuad iban anakun niya hi Datu Bebot Muidzullail bin Mahakutta' matuud nag patampal na. In pamili sin Julaspi Kiram yari ha Sabah imuplut na. Damikkian in manga pamili Shakirullah sampai na pa Pulalun, abut na mari pa manga BANTILAN CLAN naghibal na katan umagaw sin pagnganan KAWASA SIN KAMAASAN SULTANATE OF SULU AND NORTH BORNEO.

12: Nangdaug in Malaysia ha paghukum ICJ tahun 2002, dihaini timagna' na in nafsu sin MILIKAN. Liyawag sin Milikan in manga pamili sin manga Sultanate of Sulu. Sabab bahasa sin Terrorist Abu Sayyaf sugpat pa Osama ben Laden yari ha Mindanao, subay in Milikan sumud pa Mindanao tumabang ha Philippins mamunu' ha manga terrorist. In nag pasud ha Milikan pa Mindanao hi President Gloria Macapagal Arroyo.

13: “..the United States may eventually want to re-establish major conventional bases in this geographic heart of maritime Southeast Asia. Since 2002, the United States has, through a 'back door' approach, incrementally integrated the Philippines into its forward military posture in Asia. It refers to its bases in Mindanao as "forward operating bases" similar to its special forces presence in the Horn of Africa”. Link: http://www.nautilus.org/fora/security/08053Valencia.html

14: Ganap niya “The forces are called the Joint Special Operation Task Force Philippines and are an integral part of Operation Enduring Freedom, the Middle East anti-terror operation. They are considered a model for future US military operations”. Hati niya, sugpat pa operation sin Milikan ha Middle East abut sampay pa Philippines... pula'mu, daing ha tahun 2002 pa in kasud sin Milikan pa Mindanao, sabab sadja sin ABU SAYYAF terrorist bahasa sugpat pa Osama ben Laden Alqaeda. Satru' bayannnnm....

15: Awun nakasuy suy, sawaypa hi Gloria Macapagal Arroyo nagpasud ha Milikan pa Mindanao, in Milikan dima muna nagisun iban hi sultan Jamalul Kiram III, in nag wakil manghud niya hi Datu Esmail II, pagsakali ini magtuy saini simakat naysab nagsultan in hi Datu Esmail ha pitsa 12 March 2001. Bakas niyasihatan hi Datu Albi supaya di' siya sumakat magsultan sabab in magulang niya hi Sultan Jamalul Kiram III buhi' pa. Way ra nagasip, nagsultan da siya, ampa siya diya sin Milikan pa USA. Pagui' niya pa Philippines amuna in kasud sin Milikan piyamahalayak pa hi Gloria M. Arroyo ha tahun 2002. Ha masa ini, in manga naggugulal sultan dimihil na lapal pa Malaysia, nagsukut na sin manga alta' bahagi' sin padjakan Sabah.

16: Pagka mataud na imakun Sultan Sulu nagsukut na sin indaginis sukay, marai' nahilu in u hi PM Malaysia hi Dr Mahathir, pagabut tahun 2004, hiyundungan sin Malaysia in pagdihil RM5300 pa lowyar sin Legasi Sultanate of Kiram ha Manila. Abut hi Sultan Muidzullail Tan Kiram nagpara sulat pa ambasador sin Malaysia ha Manila nagsukut, sagawa' laung sin report, asal hiyundungan na sin Malaysia tub-tub da tahun 2004. Laung sin kaibanan, asal natapus na in padjakan 50 tahun, 2004 in janji' subay bahasa hikabalik patagdapu.

17: In masaalla duun, bang bunnal sawpama hibalik, in katukbalan amura in PHILIPPINES, sabab in institution sin Sultanate of Sulu way na stablish. Bima' na lupusna. Misan awun anak apu' in magpaaun balik sin Sultanate of Sulu, subay ra makawa' niya in masses (raayat Sulu) halaum 70% magdeclare bahawa in sila gapi' pa Sultanate of Sulu taga ID Citizenship sin Sultanate bukun Filipino. Hati niya hikatilahak nila in sila di' na mamoto ha election sin Philippines, voto na pa Sultanate.

18: In masaalla isab sin manga magpatitindug sultanate of Sulu ini di' na maambat in taud. Amupaka in di' mahilu Malaysia, mismu in philippines iban raayat sin Sulu nahilu ra... Bima'na, in manga Tausug di' maingat maghambuuk, apabila di' maingat maghambuuk magpatindug TUNGGAL SULTAN, nagmaksud, in Tausug di' maingat magparinta sin hula' nila kandil. Amu ini in kita' sin Milikan iban China sakit umbul satu sin manga Tausug atawa bangsa Sulu. Damikkian in Malaysia, bihadtu ra isab in kita' nila.

19: Pagabut tahun 2005, awun hambuuk anak datu panubu' sin Sultan Bantilan 1750s daing ha Lahad Datu ngiyanan Datu Ladjamura bin Datu Wasik Aranan nagkampen pakabay bayan ha Lahad Datu, Sampulna', Sandakan sampai na pa Kota Kinabalu, ijajahan niya in manga bangsa Sug supaya magbalik batang pa pamarinta sin kamaasan nila Sultanate of Sulu bat in bangsa Sulu pagaddatan biya' sin bangsa dugaing Mahardika'. In anak Datu ini liyang sin parinta Lahad Datu bat di' namayan mangabayan magkampen... pagka hatiku nagpasu' na, in anak Datu ini minui' pa Siyasi hula' sin kaapuan niya ampa siya piya Sug nagkampen.

20: Ha tahun 2007, miyustak in FIRST PARADE ha Sug baktulan hi Datu Ladjamura ini ngiyanan niya UNITED TAUSUG CITIZEN (UTC) iban pagda panji pula, najugjug in Philippines na tannyag mari pa Malaysia, in Milikan namanduga bang unu naman in kaabutan sin UTC yaun. Nasaplag na in fitnah bahasa kunu' in UTC baktulan sin Malaysia mamuhinga' hipamaus ha Philippines.

21: Ha duhul tahun 2007 nagtagha' sadja hi Prof Nur Misuari hiyatud sin Malaysia pa Manila. In lugay niya nasaggaw di ha Malaysia ampa siya hiyatud. Hiyukum siya sin court Philipines ha tahun 2008 ampa siya dihilan kalimayahan sin court.

22: Ha tahun 2009, in pagparade sin UTC ha Sug masi-masi namayan, in manga mayul, gubnul, marines, pulis halaum halli' iban nag aanib namayan nagjajaga ha kahalan sin UTC. Abut siyumpitan tubig in manga UTC ha unahan sin Municipal nagparade, siyaggaw in kaibanan sin mayul Amin iban in plackad nila iyagaw. Najugjug naysab in Pinas abut mari pa Malaysia, nagkasusahanna in manga taga INTEREST bakas nakabinsana' ha manga Tausug.

23: Pagka baha' wayra memorendum sin manga magpaparade UTC madtu pa Malacanang duma magbalharap, lagi' nabista sin Pilipinas wayra miyagad pa UTC in majoriti sin TAUSUG JOLO, nabista nila in kamatauran miyaun nag parade daing ha guwa' Jolo ra, iban wayra isab in parinta Milikan kiyatukbalan memorendum sin UTC duma magbalharap, iban in UTC mahanung da di' mabaya' maghilu hala', in kaawnan niya piyasaran nila sadja in UTC.

24: Naglami na tuud in UTC nagtransform na pa ngan SSDI (Sulu Sultaniya Darul Islam) nagdura' hapagpasakat sultan kan Datu Ladjamura @ Sultan Bantilan II, nakalamud pa in baran ku ha kahalan ini. Ha tahun 2010 sin 17 November nagdeclare in SSDI Kamahardikaan niya timagna' daing ha tahun 1405. Najugjug naysab in Pilipinas abut mari pa Malaysia. In kiyabugaan nila sabab nagsugpatna in SSDI iban jamaah FPI ha indonesia. Siguru tuud in himalli' haini Milikan sabab mabunsi sila ha Jamaah FPI.

25: Mahi sayni pag bulan Januari 2011 in Academy Army sin USA nagukab sila class manghindu' bahasa Sug, hinduan magsinug in labi 3000 army nila. Kiyasautan ku naSAVE in data website nila, marai' pataurun sin Milikan in army nila ha Sug amuin maingat magsinug. Satru' bayannnnnnn......

26: Pag abut sadja tahun 2012, presiden hi Noy Noy Aquino tiyawag hi Queen Elizabeth pa astana Buckingham niya ha UK. Nagisun kahalan sin maghurut petroleum (marai' ha Sulu sea iban South China Sea) iban tumabang in Queen Elizabeth magpakusug sin Philippines, biyaita' halaum report, hi Noy Noy nagdara proposal PEACE AGREEMENT MANILA-MILF biyuklad niya ha Prime Minister sin UK.

27: Ha gitungan tahun 2012, nagsign peace agreement in Manila iban MILF kiyasaksian sin Malaysia ha way lamud sin OIC. Limungkahad hi Prof Nur Misuari iban MNLF niya diyugalan. Magtuy in MNLF nagkampen simulang ha Peace Agreement sin Manila-MILF. Magtuy nasaplag in suy suy, nagtraining isab kunu' in manga sundalu sin kiram ha Pu' Simunul sumud kunu' mamunu' pa Sabah. Awun kunu' hambuuk pari' (Padre) miyadtu pa Simunul naglang supaya hundungan in pagtraining bat kunu' di' mahinang sabab makapagbunu' in Malaysia iban Pilipinas. In suy suy ini asal diyungug kuna ha masa kakadtu ku pa Sug ha bulan Januari 2012 nagda ha manga visitor daing ha Spanyol iban Jipun iban pihak sin manga hula' Francis.

28: At the same time sambat sin Anggalis, awun hambuuk manusiya' nagnama in siya kunu' daing ha UNITED NATION miyadtu kan prof Nur Misuari namayta' bahasa in MNLF limingkud na mamarinta. In suy suy ini nakaabut sampay pa Sabah nahilu hala' na in manusiya' mamarinta na laung nila in MNLF. Subay laung nila magpatindug panji magdeclare KAMAHARDIKAAN BANGSAMORO. (Ubus bunu' sin Zambo *MNLF vs Philippines, in tau nagnama wakil sin United Nation ini nasaggaw sin intiligin sin Filipinas... iyakkalan niya in MNLF papagbunuun ha Zambo manga 3 pa 5 adlaw, ampa kunu' sumud in United Nation tumabang dimihil kamahardikaan ha MNLF).

29: Mahita' sayni pagabut 2013, simud in manga Kiram daing ha pu' Simunul pa Sabah nagbunu' iban manga pulis Malaysia. Iyutan manga pilangkapitu, simud isab in MNLF pa Zamboanga nagbunu' imatu ha sundalu sin philippines. Nahansul in kiram, naubus in MNLF ha Zamboanga, in kaibanan nakapaguy.

30: Ha gi'tungan tahun 2013 nabaktul in ESSCOM (EASTERN SABAH SECURITY COMMAND) ha Sabah palsababan sadja sin 3 parkala': Mamunu' in Sultan Kiram, Mamunu' in MNLF, Mamunu' manglundat in Abu Sayyaf, hambuuk pa ganap, bat di' sumud in manga manglalawag kabuhianan way passport. Ha 3 palsababan ini simud in USA pa Malaysia tumabang dimihil TRAINING ha Malaysia magdefense sin baran niya. In program Training sin USA nagdura' iban training niya iban Philippines. Masawa tuud katu' in training ini hipagpatanam bunu' umatu ha CHINA. Bang umabut na in masa, sudlatun da sin USA in bautut sin CHINA yaun ha Spratly Islands. Bommmmm!!! Bunu' dakula'....

HA KAHINAPUSAN:

Bihaun in Tausug (Malaysia-Philippines) subay matali', ayaw umus-us lumungkahad umatu misan di' makaatu, pangadjian muna in katitipuhan sin satru' timinggil ha isug sin Tausug. In manga Tausug misan sila haiin nakabutang, subay magisun mawpakkat magkasi lasa, magpaag piyaagi, magprogram hikarayaw sin komunity nila sadi' pa maawun in bunu' dakula' ha susungun masa.

In 4 groupo sin bangsa Sug yaun ha kapuan sin Sulu (MNLF, Abu Sayyaf, Pulitisyan Tausug Filipino, Manga ginisan Sultanate of Sulu) subay sila maingat magtaayun bukun magagaw iyagawi. Di' makaagaw unu-unu in manga napupulakkanat. Majugjug in Sulu Archipelago pagdungug sin DUNNYA, in 4 groupo yan nahambuuk na nahinang hambuuk SUARA magmahi sin kabayaan nila.

La hawla wala quwwata illa billah!!

Maas Pusung
02 Disember 2015